ភ្នំពេញ ៖ អគារសាលាខណ្ឌដូនពេញក្រោយពីសាងសង់រួចរាល់ជាស្ថាពរហើយ បានធ្វើពិធីសូត្រមន្តចម្រើនព្រះបរិត្តក្រុងពាលី និង ពិសាអាហារសាមគ្គី អរគុណសន្តិភាព ក្រោមអធិបតីភាព លោកហែម អាន ប្រធានក្រុមប្រឹក្សាខណ្ឌ និង ភរិយា និង លោក សុខ ពេញវុធ អភិបាល នៃគណៈអភិបាលខណ្ឌដូនពេញ និងភរិយា រួមទាំងមន្ត្រីក្រោមឱវាទ។
ពិធីសូត្រមន្តចម្រើនព្រះបរិត្តក្រុងពាលីអគារ សាលាខណ្ឌដូនពេញថ្មី និងពិសាអាហារសាមគ្គីអរគុណសន្តិភាពធ្វើឡើងកាលពីព្រឹកថ្ងៃទី៣១ ខែមករា ឆ្នាំ២០២០នេះ។
ជាមួយគ្នានោះដែរ រដ្ឋបាលខណ្ឌដូនពេញ មានកិត្តិយសសូមជម្រាបជូនដំណឹងដល់បងប្អូនប្រជាពលរដ្ឋទូទៅ សិស្ស និស្សិត និងសាធារណជនទាំងអស់ មេត្តាជ្រាបថា រដ្ឋបាលខណ្ឌដូនពេញ បានផ្លាស់ប្តូរទីតាំងអគាររដ្ឋបាលខណ្ឌ(ទីតាំងបណ្តោះអាសន្ន) ពីផ្លូវលេខ១១៨ កែងផ្លូវលេខ១៩ សង្កាត់ផ្សារចាស់ ខណ្ឌដូនពេញ មកទីតាំងថ្មី ស្ថិតនៅអគារលេខ១១ ផ្លូវលេខ៩០ភូមិ១០ សង្កាត់វត្តភ្នំ ខណ្ឌដូនពេញ (ខាងក្រោយបណ្ណាល័យជាតិ) វិញ ចាប់ពីថ្ងៃទី៣១ ខែមករាឆ្នាំ២០២០ នេះតទៅ។
អាស្រ័យហេតុនេះ សូមបងប្អូនប្រជាពលរដ្ឋ សិស្ស និស្សិតនិងសាធារណជនទូទៅដែលមានបំណងមកទទួលយកសេវាសាធារណៈផ្សេងៗមេត្តាមកទីតាំងសាលាខណ្ឌថ្មីចាប់ពីថ្ងៃនេះតទៅ៕
