រថយន្ដដឹកឈើមួយគ្រឿង ធ្វេសប្រហែស ធ្វើឱ្យធ្លាក់កំណាត់ឈើលើផ្លូវ ស្របពេលបុរសម្នាក់កំពុងជិះម៉ូតូ ក៏បានបុកដួល ហើយមានរថយន្តមកពីក្រោយបុកស្លាប់ភ្លាមៗ រួចបើកគេចខ្លួនបាត់ នៅបាត់ដំបង
(ថ្ងៃទី 08 January 2021 ម៉ោង 3:59 pm)
បាត់ដំបង ៖ នាថ្ងៃទី០៨ ខែ មករា ឆ្នាំ២០២១ លើកំណាត់ផ្លូវជាតិលេខ៥ ក្នុងភូមិតាសី ឃុំតាម៉ឺន ស្រុកថ្មគោល ខេត្តបាត់ដំបង ។
មុនពេលកើតហេតុ មានរថយន្តមួយគ្រឿង (មិនស្គាល់ម៉ាក) ដែលមានដឹកដុំឈើជាច្រើនដុំ បើកបរក្នុងទិសដៅពីជើងទៅត្បូង ហើយបានធ្លាក់កំណាត់ឈើមួយដុំលើផ្លូវ ស្របពេលនោះដែរ ម៉ូតូជនរងគ្រោះម៉ាកឌ្រីសេ១២៥ ពណ៌ខ្មៅ សេរី២០១៥ បើកមកកិនឈើនោះ បណ្តាលឱ្យដួលនៅកណ្តាលផ្លូវ ក៏ត្រូវរថយន្តមួយគ្រឿងទៀតបើកមកពីក្រោយ កិនបន្ថែមទៅលើអ្នកបើកបរម៉ូតូ បណ្ដាលឱ្យស្លាប់តែម្តង ។
ជនរងគ្រោះមានឈ្មោះ ឆុន រីឆាត អាយុ១៥ឆ្នាំ រស់នៅភូមិនិគមក្រៅ ឃុំជ្រោយស្តៅ ស្រុកថ្មគោល។ ក្រោយពេលកើតហេតុ រថយន្តទាំង២គ្រឿង បានបើកគេចខ្លួនបាត់ស្រមោលទាំងអស់ ដោយឡែកសព ត្រូវបានសមត្ថកិច្ចប្រគល់ទៅឱ្យក្រុមគ្រួសារ យកទៅធ្វើបុណ្យតាមប្រពៃណី៕
