តាមប្រភពពីមន្ត្រីជំនាញចរាចរណ៍នៃអធិការស្រុកមេមត់ បានឲ្យដឹងថា ៖ មុនពេលកើតហេតុ គេឃើញរថយន្តម៉ាកតូយ៉ូតាហ៊ីលុច វីហ្គោ ពណ៌ទឹកប្រាក់ ពាក់ផ្លាកលេខ ភ្នំពេញ2AM-0936 បើកបរដោយឈ្មោះ ទា សុខហេង ភេទប្រុស អាយុ៥៨ឆ្នាំ ជនជាតិខ្មែរ រស់នៅភូមិមេមត់កណ្ដាល ឃុំមេមត់ ស្រុកមេមត់ បើកបរក្នុងទិសដៅពីទិសត្បូង ទៅជើង តាមបណ្ដោយផ្លូវអភិវឌ្ឍន៍ក្រាលគ្រួសក្រហម ប្រើប្រាស់ល្បឿនយ៉ាងលឿន បានរេរចង្កូតរអិល ក្រឡាប់ធ្លាក់ផ្លូវ (ផ្លូវនេះក្រឡុកៗដាច់ៗនៅចញ្ចើមផ្លូវ) បណ្ដាលឲ្យអ្នកបើកបរ ខ្ទាតចេញតាមកញ្ចក់ចំហៀងបោកនឹងដីស្លាប់ភ្លាមៗនៅកន្លែងកើតហេតុតែម្ដង។

សមត្ថកិច្ចបានសន្និដ្ឋានថា ករណីនេះមកពីកត្តាការបើកបរល្បឿនលឿនជ្រុល បើកបរធ្វេសប្រហែសលើផ្លូវរអិល និងមិនបានពាក់ខ្សែក្រវ៉ាត់សុវត្ថិភាព។

ក្រោយកើតហេតុ សពត្រូវបានក្រុមគ្រួសារយកទៅធ្វើបុណ្យតាមប្រពៃណី ចំណែករថយន្តត្រូវបានសមត្ថកិច្ចជំនាញធ្វើការវាស់វែងរួចប្រគល់ជួនគ្រួសារសពវិញផងដែរ៕