ឃាត់ខ្លួនជនសង្ស័យ ២នាក់ ខណៈ២នាក់ទៀតកំពុងគេចខ្លួន ករណីឆក់កាបូប នៅភ្នំពេញ
(ថ្ងៃទី 06 January 2021 ម៉ោង 8:58 am)
ភ្នំពេញៈ កាលពី រសៀល ថ្ងៃទី៥ ខែមករា ឆ្នាំ២០២១ ស្ថិតនៅតាមបណ្តោយផ្លូវបេតុង ភូមិស្រែជះ សង្កាត់សំរោងក្រោម ខណ្ឌពោធិ៍សែនជ័យ រាជធានីភ្នំពេញ។
ជនសង្ស័យដែលឃាត់បានទី១មានឈ្មោះ អឿន រតន ភេទប្រុសអាយុ១៦ឆ្នាំ រស់នៅភូមិប៉ាយាប សង្កាត់ភ្នំពេញថ្មី ខណ្ឌសែនសុខ រាជធានីភ្នំពេញ។
ទី២មានឈ្មោះ សុ ធារ៉ា ភេទប្រុស អាយុ១៦ឆ្នាំ រស់នៅភូមិសែនសុខ៧ សង្កាត់ឃ្មួញ ខណ្ឌសែនសុខ រាជធានីភ្នំពេញ។
សម្ភារៈដកហូតបានម៉ូតូម៉ាកស្តុបពីពណ៍ស ពាក់ស្លាកលេខ ភ្នំពេញ 1IL-9990 និងមួយគ្រឿងទៀតឌ្រីមសង់ឆ្នាំ២០២០ ពាក់ស្លាកលេខ ភ្នំពេញ 1HZ-2841 ជារបស់ជនសង្ស័យ។
ចំណែកជនរងគ្រោះមានឈ្មោះ ពៅ ស្រីនិច្ច ភេទស្រី អាយុ២២ឆ្នាំ។
មុនពេលកើតហេតុនារីរងគ្រោះជិះម៉ូតូស៊េរីឌ្រីមសង់ឆ្នាំ២០២០ ពាក់ស្លាកលេខ ភ្នំពេញ1IE-8789 បានធ្វើដំណើរតាមបណ្តោយផ្លូវបេតុងក្នុងទិសដៅពីកើតទៅលិចតែម្នាក់ឯង ស្របពេលនោះស្រាប់តែលិចមុខក្រុមជនសង្ស័យចំនួន៤នាក់ជិះម៉ូតូ៣គ្រឿងតាមមកពីក្រោយរួចធ្វើសកម្មភាពឆក់កាបូបរបស់នារីរងគ្រោះបានសម្រេច រួចនាំគ្នាព្យាយាមជិះគេចខ្លួនតែត្រូវជនរងគ្រោះជិះដេញតាមនិងស្រែកឆោឡោពីក្រោយបានប្រហែល៥០០ម៉ែត្រទើបប្រជាពលរដ្ឋស្ទាក់ចាប់បានជនសង្ស័យ២នាក់ ចំណែកបក្ខពួក២នាក់ទៀតជិះគេចបាត់ស្រមោល ៕
