(ខេត្តកែប)៖ នៅរសៀលថ្ងៃទី០៨ ខែតុលា ឆ្នាំ២០១៩ សមត្ថកិច្ចចម្រុះ ដឹកនាំដោយ លោក ម៉ុត ដារ៉ា ព្រះរាជអាជ្ញារងអមសាលាដំបូងខេត្តកំពត បានចុះត្រួតពិនិត្យ និងធ្វើការសម្របសម្រួលទីតាំងដីទំនាស់មួយកន្លែងដែលមានប័ណ្ណកម្មសិទ្ធិចំនួន៣ជាប់គ្នា រួមមាន៖ ប្លង់កម្មសិទ្ធិ លេខក្បាលដី៤០៥៨ ,៤០៥៧ និង៤០៦៤ ស្ថិតនៅភូមិដំណាក់ចង្អើរ សង្កាត់ព្រៃធំ ក្រុងកែប ខេត្តកែប ដែលមានការចូលរួមសម្របសម្រួលពីគណៈកម្មការចម្រុះ ដូចជាអាជ្ញាធរក្រុង ប្រធានភូមិបាលក្រុង អាជ្ញាធរមូលដ្ឋាន និងកម្លាំងប្រដាប់អាវុធផងដែរ។
ការចុះត្រួតពិនិត្យនិងការវាស់វែងកំណត់ព្រំដីនេះធ្វើឡើងតាមបណ្តឹងរបស់ឈ្មោះ តាក់ មុនីកោសល្យ ដែលមានប័ណ្ណកម្មសិទ្ធិ(លេខក្បាលដី៤០៥៨ ទំហំ១៥៧២ម៉ែត្រការ៉េ និង៤០៦៤ ទំហំ ៥៤១៨ម៉ែត្រការ៉េ) ដោយដីនេះមានចំណុចជាប់អមសងខាងរវាងដីភាគី ឈ្មោះ កាន់ ធី ដែលមាន(លេខក្បាលដី ៤០៥៧ ទំហំ ១៥៩២ ម៉ែត្រការ៉េ)ស្ថិតក្នុងភូមិដំណាក់ចង្អើរ សង្កាត់ព្រៃធំ ក្រុងកែប ខេត្តកែប។
ទាក់ទិននឹងការចុះត្រួងពិនិត្យនេះ លោក ម៉ុត ដារ៉ា ព្រះរាជអាជ្ញារងអមសាលាដំបូងខេត្តកំពត បានបង្ហាញថា លោកដឹកនាំគណៈកម្មការចម្រុះមកនេះ ក្នុងគោលបំណងចុះត្រួតពិនិត្យមើលការវាស់វែងកំណត់ព្រំដីឲ្យបានជាក់លាក់ពីមន្ត្រីជំនាញ និងធ្វើការសម្របសម្រួលបញ្ចៀសនូវភាពវិវាទដែលកំពុងរាុំរ៉ៃកន្លងមក។
លោកបានបញ្ជាក់ផងដែរថា ការវាស់វែងកំណត់ព្រំប្រទល់នេះ គឺរកជើងម៉ែត្រដើម្បីរកទំហំពិតប្រាកដក្នុងប័ណ្ណសម្គាល់អចលនវត្ថុនិមួយៗ ព្រោះថាប្លង់ដីទាំង៣ប្លង់នេះពិតជាបានទទួលស្គាល់ពីម្ចាស់ដីរៀងៗខ្លួនទៅហើយ។ ម្យ៉ាងទៀតលោកមិនទាន់អារកាត់ឲ្យទៅភាគីណាមួយ ឈ្នះ ចាញ់នោះទេ។ដូច្នេះប្រសិនបើម្ចាស់ប្លង់កម្មសិទ្ធិ ឈ្មោះ កាន់ ធី មិនសុខចិត្ត នឹងការវាស់វែងកំណត់ព្រំដោយមានការចូលរួមពីមន្ត្រីគ្រប់ជំនាញនាថ្ងៃនេះ គាត់អាចប្តឹងតវ៉ាទៅស្ថាប័នច្បាប់បន្តទៀត។
ក្នុងករណីនេះដែរ លោកពូ កាន់ ធី ដែលជាម្ចាស់ប្លង់កម្មសិទ្ធិសម្គាល់អចលនវត្ថុ លេខ ៤០៥៧ បានឲ្យដឹងថា ដីកំពុងវិវាទនេះ គឺជាដីកេរដំណែលពីឪពុកម្តាយ ដោយកន្លងមកដីចំណុចនេះគាត់បានជួលឲ្យទៅខាងក្រុមហ៊ុនដាក់បង្គោលអង់តែនទូរស័ព្ទ ប៉ុន្តែប្រាក់កម្រៃគាត់មិនដែលបានទទួលម្តងឡើយ ដោយសារប្អូនប្រុសរបស់គាត់ឈ្មោះ កាន់ ធឿន បានយកថ្លៃជួលប្រចាំខែជាប់រហូត។លុះប៉ុន្មានឆ្នាំចុងក្រោយនេះ ស្រាប់តែឈ្មោះ កាន់ ធី ជាប្អូនបង្កើតបានលក់ដីស្រែនៅខាងក្រោយដីទំនាស់នេះ ទៅឲ្យឈ្មោះ តាក់ មុនីកោសល្យ ទើបមានប្លង់ចេញក្តោបយកទាំងដីនៅខាងមុខតែម្តង។
ដោយឡែក បើតាមការអះអាងពីម្ចាស់អចលនវត្ថុ ឈ្មោះ តាក់ មុនីកោសល្យ កាន់ក្បាលដីលេខ៤០៥៨ និងលេខ ៤០៦៤ បានឲ្យដឹងថា គាត់ប្តឹងជំទាស់នេះ ដោយសារថ្មីៗនេះឃើញក្រុមគ្រួសាររបស់ឈ្មោះ កាន់ ធី សង់លំនៅដ្ឋានស្ថិតក្នុងប្លង់កម្មសិទ្ធិរបស់គាត់ ទើបគាត់ជាម្ចាស់ប្លង់ប្តឹងទៅអាជ្ញាធរមានសមត្ថកិច្ចឲ្យជួយរកដំណោះស្រាយតែម្តង។
ពាក់ព័ន្ធនឹងការវិវាទដីធ្លីដែលមានប័ណ្ណអចលនវត្ថុខាងលើ លោក វិញ ថុល ប្រធានភូមិបាលក្រុងកែប បានឲ្យដឹងថា ការចុះមកវាស់វែវកំណត់ព្រំដីចំណុចភូមិដំណាក់ចង្អើរ សង្កាត់ព្រៃធំ ក្រុងកែប ខេត្តកែបនេះ គឺដើម្បីផ្ទៀងផ្ទាត់នូវទំហំដ៏ពិតប្រាកដជូនម្ចាស់ដី ក្នុងគោលបំណងបញ្ចៀសនូវជម្លោះ ហើយការវាស់វែងកំណត់ព្រំនេះ គឺវាស់ទៅតាមអ្វីដែលមានស្រាប់ហើយ ពោលគឺទំហំក្នុងប្លង់កម្មសិទ្ធិមានប៉ុន្មានគឺត្រូវទទួលស្គាល់ប៉ុណ្ណឹង ធ្វើបែបនេះដើម្បីបញ្ចប់វិវាទនៅពេលក្រោយ៕
សហភាតរៈ
