រថយន្តក្រឡុកស៊ីម៉ង់ត៍ សង្ស័យដឹកធ្ងន់ពេក បណ្តាលឱ្យបាក់ស្រុតផ្លូវបេតុងមួយកន្លែង ទៅមុខលែងរួចមក

ភ្នំពេញ ៖ នេះហើយដែលជាមូលហេតុផ្លូវមួយចំនួន ទទួលរងការខូចខាត ក៏ព្រោះតែរថយន្ត ដឹកមិនប្រមាណពីទម្ងន់ ជាក់ស្តែងផ្លូវបេតុង មួយកន្លែង រងការខូចខាត ដោយសារតែ រថយន្តក្រឡុកស៊ីម៉ងត៍ សង្ស័យដាក់លើសទម្ងន់ បានបាក់ស្រុត នាព្រឹកថ្ងៃទី៣ ខែមិថុនា ឆ្នាំ២០២២ ស្ថិតនៅភូមិត្នោតជ្រុំ៣ សង្កាត់បឹងទំពន់២ ខណ្ឌមានជ័យ រាជធានីភ្នំពេញ។
ប្រភពនៅកន្លែងកើតហេតុបានឲ្យដឹងថា មុនពេលកើតហេតុ គេឃើញមានរថយន្តលាយក្រឡុកបេតុងជាច្រើនគ្រឿង បានដឹកបេតុងដែលលាយរួចចេញពីក្រុមហ៊ុន ដើម្បីយកមកក្រាលចាក់ឃ្លាំងការដ្ឋានមួយកន្លែង ដែលទើបនឹងសាងសង់ថ្មីនៅចំណុចកើតហេតុខាងលើ ចុះពីផ្លូវ៣៧១ ចូលមកផ្លូវបេតុងក្នុងភូមិត្នោតជ្រុំ៣ ប្រហែងជាង៥០ម៉ែត្រ ស្របពេលនោះ ក៏មានរថយន្តដែលបង្កឲ្យបាក់ស្រុតផ្លូវបេតុងមួយគ្រឿង ម៉ាកHINO ពណ៌ក្រហមពាក់ស្លាកលេខភ្នំពេញ 5A-1361 បានដឹកបេតុងចូលមកចាក់ក្រាល ខណៈមកដល់ច្រកចូលផ្លូវ៣៧១ រថយន្តខាងលើបានបត់ស្តាំចូល ហើយក៏បានបា.ក់ស្រុតរថយន្តហើបកង់មុខ ប៉ះជាមួយបង្គោលភ្លើងផ្អៀងរថយន្ត ចុះទៅខាងក្រោមទៅមុខលែងរួច។
សមត្ថកិច្ចមូលដ្ឋាន សហការជាមួយមន្ត្រីអគ្គិសនីកម្ពុជា ចុះទៅពិនិត្យនៅទីតាំងកើតហេតុ ដើម្បីវាយតម្លៃពីទំហំនៃការខូចខាត និងឲ្យខាងក្រុមហ៊ុនរថយន្តលាយបេតុង សងថ្លៃខូចខាត និងជួសជុលផ្លូវ និងបង្គោលភ្លើងឡើងវិញ ដើម្បីបញ្ចប់រឿងនៅកន្លែងកើតហេតុតែម្តង៕